TURA: West Garo Hills a·jaoba COVID-19-ni batrikrikaniko warachakangkuna gita re·baenggipa June 14 tarikona lockdown-ko ra·gatangkuaha ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, lockdown-ko ra·gatanio pilak nangchongmotgipa dokkanrangko Sombar saloni Sukrobar salona pring 8:00 bajioni attam 1:00 bajiona kulianggen indiba hardware, electrical, computer tarigipa aro uandakgipa dokkanrangko man·chape nangchongmota ong·gijagipa dokkanrangkode Mongolbar aro Bristibar salrango pring 8:00 bajioni attam 1:00 bajiona kuliangskagen.
Garirangkoba odd/even nomboro pangchake re·rurana gita district administration, niamko donataha.
Deputy Commissioner-ni u·iatani gitade, Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar salrangode 1,3,5,7 aro 9 nomborchi bon·egipa garirang re·ruraskana man·gen.
Indake ong·genchimoba attam 2:00 bajionide salantian curfew a·bachengengahani gimin 2:00 bajini ja·mande gari gorarang re·rurana man·jawaha ine DC u·iataha.
Sonibar aro Robibar salrangode West Garo Hills a·ja gimikon chu·gimik lockdown ong·angkugen aro ia salrangode dokkanrangko kulina man·jawa aro gari gorarangba re·rurana man·jawa ine DC u·iataha.