SHILLONG: East Khasi Hills a·jao aro mongsongbate Shillong songjinmao COVID-19 man·giparang batroroengkuani gimin a·dok sorkari, re·baenggipa June 14 tarikoni June 21 tarikona lockdown-ko antisana ra·dodapattaiaha.
East Khasi Hills a·jao lockdown-ko antisana ra·dodaptaina sorkari manchiangahaoba gipin dam 10 a·jarangnade sorkari, deputy commissioner-rangna pakwatangenba, nangani kri lockdown-ko aro niamrangko ra·gatangkuchina bilko on·angskaaha.
Sukrobar salo Meghalaya a·dokni Chief Minister Conrad K Sangma, West aro East Jaintia Hills a·jarango COVID-19-ni giproroaniko champengna tarisamsoanirangko nina gita Jowai-ona re·angenba, joljol Jowai-o Deputy Commissioner-ni office-oni cabinet minister-rang aro East Khasi Hills a·jani official-rang video conference gita chanchirimangaha aro East Khasi Hills a·jao antisana lockdown-ko ra·dodaptaina manchiangaha.
“Meghalaya a·doko COVID-19 man·giparang ka·sinsin komiangengoba East Khasi Hills a·jaode komikujaengani gimin mikrake dongkuna nangenga ine nikenba sorkari, East Khasi Hills a·jaode antisana lockdown-ko ra·gatangkuna tik ka·aha,” ine Chief Minister parakataha.
Sukrobar salsani gisepon East Khasi Hills a·jao sak 183 manderang COVID-19 man·daptaiahachim aro uandaken da·o East Khasi Hills a·jao COVID man·e dongenggiparang sak 1,877 gapengahachim.
Meghalaya a·dokni gipin a·jarangna donatgimin niamrangni gimin talatangengon, gipin a·jarangode obostarangko nigrike lockdown-rangko aro niamrangko ra·gatchina deputy commissioner-rangko ge·etmanaha indiba nangchongmota ong·gijagipa dokkanrangkode pilak biaprangon 20 percent-na bate kulina man·jawa ine Chief Minister parakataha.
Commercial garirang ba manderangko salruragipa bus, autorickshaw, taxi aro uandakgipa garirangkoba obostani kri watna man·gen indiba 20 percent-na bate watna man·jawa ineba Chief Minister parakataha.
Da·o dipet a·dokni pilak biaprangon jinma tom·bimonganirangko ong·atna man·skakujawa.