TURA: South West Garo Hills a·jao COVID-19 man·ani 10 percent batengahani gimin aro a·jani dingtang dingtang biaprango salantian COVID-19-ko man·giparang batroroengani gimin South West Garo Hills a·ja gimikon re·baenggipa June 21 tarik pring 5:00 bajiona kingking chu·gimik lockdown-ko ra·gatangaha ine South West Garo Hills a·jani District Magistrate u·iataha.
Lockdown-ni somoio nangchongmotgipa dokkanrang aro sam dokkanrangna agrede gipin dokkanrangko kulina man·jawa aro gari gorarangba nangchongmotgipa bosturangko salruraenggipa garirang, sanna banani kamrangko ka·enggiparang aro gipin nangchongmotgipa kamrangko ka·enggiparangna agrede re·rurana man·jawa.
Mande sianirangode district administration-oniko permission ra·chengenba sak 10-na bate manderang tom·chimongna man·jawa indiba da·o dipet bia ka·anirangkode ong·atna on·kujawa ine South West Garo Hills a·jani District Magistrate u·iataha.
Lockdown-ni somoio bank aro sorkari office-rangko kulina man·gen indiba mask gangijagipa manderangde office-rangchi napna man·jawa.
Lockdown-ni somoio bostu salruragipa garirang, medical, police, civil defence & home guards, fire & emergency service, MeECL, PHE, agriculture aro veterinary, municipal, PWD, NHAI, FCI, petrol, diesel, LPG, press aro uandakgipa nangchongmotgipa manderangni re·ruraanikode champengani dongjawa ineba u·iataha.