SHILLONG: East Jaintia Hills a·jani Umpleng jolo donggipa Krem Ule-ni koela a·kolo gimaenggipa manderangoni sakgnini manggisiko Mongolbar salo Indian Navy-ni chining ripgipa sipairang, koela a·koloniko nikaha indiba da·o dipet ia manggisirangko ra·ongkatna man·kujaenga ine kobor on·aha.
Re·anggipa May jani 30 tariko Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba ia koela a·kolo koela bikotenggipa sakbonga manderang gimaengachim.
Indake ong·engon, ia koela a·kolo gimaenggipa manderangoni sakgnini manggisikode Mongolbar salo Indian Navy-ni diver-rang koela a·koloniko nikaha aro da·o ia manggisirangko koela a·koloniko ra·ongkatna gita Navy baksana NDRF, SDRF aro SRT-ni sipairang kamko ka·enga ine ua biapo kamko nirokenggipa official-rang parakataha.
Ia koela a·kolo a·sel ong·ani da·o antigni batangpilengahaoba koela a·kolo gimaenggipa manderangko man·pilkujaengani gimin a·dok sorkari, Indian Navy-ni chi ripgipa manderangko okamatahachim.