TURA: Tura-o COVID-ni kamko ka·enggipa special executive magistrate (SEM Covid) saksani kam matchote nokchi re·angpilengmiting somoio Traffic-ni sub-inspector (SI) officer saksa uko kragija kattarangchi aganahani gimin ia police officer-ni kosako West Garo Hills a·jani Superintendent of Police (SP)-na badi ka·doangaha.
SP-na badi ka·anio ia special executive magistrate-ni parakatani gitade, re·anggipa June-ni 13 tarik Robibar attamo ua, Tura Municipal Board-ni membor-rang baksa COVID man·e sianggipa mande saksako so·anio kamrangko matchote Tura Main Police Station gita noktangtangchi re·angpilengachim. Police station-ona sokon ua biapo kamko ka·enggipa police officer, uamangko neng·takatenba sing·rikkie roaha aro uamang an·tangtangni identity card-rangko mesoke, COVID-ni kamko ka·giparangsa ine aganahaoba, ia executive magistrate-ko kragija kattarangchi agane roskaahachim.
“Uamangba an·tangtangna dongimin kamkosa ka·engani gimin anga uamangni kamko mittelna ska indiba ua somoio angni bimangko nie ua police officer, ang baksa kam ka·rimgiparangni mikkango angko chonnika gnang aganahani giminsa anga ia police officer-ni kosako badi ka·enga,” ine special executive magistrate, SP-na badi ka·doanggipa chittio parakataha.
Ia special executive magistrate-ni parakatani gitade, ia obostani bidingo ua SP aro Tura Thana-ni OC-naba phone ka·e u·iatahachim indiba ia police officer-ni kosako maming ja·kurangko de·jahani gimin ua seachiba SP-na badi ka·doangaha.
Indake ong·engon, COVID giproroani somoio an·tangtangko on·kange kam ka·enggipa saksa sorkari officer-ni kosako iandakgipa kamko ka·ahani gimin Tura Bar Association-ni Advocate Bernita R Marak-ba, ia police officer-ni kamko raken jegalataha aro COVID-ni kamko ka·enggipa executive magistrate-kon police officer-rang iandake kragija dakenga ong·ode ramram manderangkode batsrangnaba gnang ine parakataha.