TURA: North Garo Hills a·jani Bajengdoba jolo donggipa Gra Songgitcham govt lower primary (LP) skul nokni obosta namsrangjahani a·sel skulo poraienggipa bi·sarang neng·nikanirangko chagrongna nangtokenga ine jolo songdongenggipa manderang parakatenba, ia skul nokko ta·raken taripile on·china gita Bajengdoba-ni MLA-ko didiataha.
Gra Songgitcham songni saksa Tengson Sangma minggipa mandeni u·iatani gitade, ia sorkari LP skulko 1953 bilsio kuliahachim indiba ia skul nokko taripile on·anirang dongjani a·sel da·o ia skul nokni obosta namsrangjaengahachim.
“Ia skulo poraienggipa bi·sarang bang·en donga indiba ia skul nokni obosta namsrangjahani a·sel skulo poraienggipa bi·sarang neng·nikanirangko chagrongna nangtokenga. Ia skul noko nokking aro pakmarangba dongjaha aro uandaken mikkarang waani somoiode ia skulo class-rangko ra·na man·jaenga,” ine Sangma parakataha.
Election-ni somoirangoba ia skul nokko polling station dake jakkalengachim indiba ia skul nokni obosta namsrangjahani a·selan election-ni somoirangoba polling officer-rang, agent-rang aro pu·ongiparangba neng·nikanirangko man·rongenga ineba songni manderang parakataha.
“Uni gimin skulo poraienggipa bi·sarangnasan ong·aigija jolo songdongenggipa pilakni namgninan ia skul nokko ta·raken taripile on·china chinga songni manderang, Bajengdoba-ni MLA-ko mol·molatenga,” ine Gra Songgitcham songni manderang parakataha.