SHILLONG: COVID-19-ni batrikrikaniko champengna dongimin niamrangko manderang manijagenchimode aro an·tangtangni kamrangon chu·ongnike dongaigenchimode Meghalaya a·dokoba COVID-19-ko man·giparang batangkugen ine a·dokni Health Minister AL Hek mikrakataniko on·angenba, gittamgipa changna COVID-19-ni giproroaniko champengsona gita sorkari committee-ko songaha ine parakataha.
Health Minister-ni parakatani gitade, Meghalaya a·dokoba gittamgipa changna COVID-19 giprorogen ine niksamsoengani gimin sorkari, ia sabisini giprorotaianiko nirokna gita paediatrician-rang aro gynaecologist-rangchi dingtangmancha committee-ko songe donangaha.
“Gittamgipa changna COVID-ni giproroaniona an·ching tarisamsona nangenga. Iani bidingo chinga committee-rangko songe donaha aro sagiparangna COVID ward-rangko bariataha,” ine Hek parakataha.
COVID-ni batrikrikaniko champengna dongimin niamrangko manderang manijagenchimode a·dokoba COVID man·giparang batangkugen ineba Hek parakataha.
“Manderang an·tangtangko naljoke rakkikujaskal aro mikrake dongkujaskal COVID man·giparang batangkugen. Manderangni chu·ongnike donganichian COVID batrikrikangkugen,” ine Health Minister aganaha.
Health Minister-ni parakatani gitade, Meghalaya a·dokoba Variant of Concern (VOC) rokomni coronavirus giproroengachim aro ian ta·raken batninggipa ong·e namen kenna nanggipa sabisi ong·achim.
COVID-ni tikarangko su·ani bidingo janapatskaengon, June 21 tarikonide tikarangko chu·onga gitan man·gnok aro a·songni pilak biaprangon tikarangko man·gnok ine a·dokni Health Minister parakataha.
“Da·o dipet chingo sal 5 sal 6-ni tikarang dongkuenga indiba bakan India sorkari tikarangko watatengahani gimin June 21 tarik dipetde tikarangko chu·onga gitan man·gnok,” ine Hek aganaha.
COVID tikarangko su·ani bidingo tol·e jangbingbangatanirangko bebera·jachina gitaba Health Minister didiattaiaha.
“Manderang pangnan tol·e jangbingbanggipa kattarangko bebera·ronga aro iani a·selan songadam nokadamrangode manderang tikarangko su·na kentokenga,” ine Hek aganenba, tika su·ani certificate donggijagipa manderangkode da·o stadium-rango napna on·jawaha ine talatangaha.
Maming sakki gri tol·e jangbingbangatenggipa manderangkode Epidemic Act-ni ning·o rim·na nangenga ineba Health Minister parakataha.
COVID man·e sianggipa manderangoni bang·batan tika su·gijagiparangsa ong·achim ineba ua aganaha.