TURA: Mija Sukrobar salo A·chik ma·gipa saksani ramasamo palenggipa me·surangko police-rang, district administration-ni ge·etaniko man·e pakrurue galaha, indake ong·genchimoba West Garo Hills district police, me·su palgipa me·chik baksa mijalo namgrikaniko dakan baksa una me·surangni palo gampilaniko dakangaha.
Unomitingo ‘‘Duko ga·akgipa mandeko West Garo Hills a·jani police-rang gronge tangka paisarangko gamskaaha. A·songko chalaigipa aro niam retirangko rakkigipa ong·e an·ching niamrangko nirokna nanga indiba an·chingni kam ka·e on·enggipa a·dokni manderangna an·ching ka·sachakna aro ma·sichakskanaba nanga. Ia mandena ta·raken dakchakaniko on·pilahani gimin anga police-rangko mittelpilna ska’’ ine Chief Minister Conrad Sangma aganaha.
Sukrobaro Turao me·chikma saksani me·su palako, dongimin somoina bate palani gimin police, nosto ka·e galanina Garo Hills-ni dingtang dingtang dolrang matnangatan baksa Social mediaoba police dolni kosako matnanganian gapchipahachim.
Indake ong·genchimoba West Garo Hills Police, gong·raken me·chikma baksa nangrimgrikaniko dakenba gampilaniko dakangaha. Indake uamangni namgipa ja·ku de·anina Chief Minister aro bang·a manderangan mittelpilskaani kattarangkoba paraktokaha.
