TURA: South Garo Hills a·jani Chokpot Block-ko civil sub-division songchengaonin circuit house dongkujaengani gimin dingtang dingtang dilgiparangko aro sorkari officer-rangko donchakna biaprang dongjae neng·nikanirangko chagrongna nangenga ine Garo Hills Autonomous District Council (GHADC)-ni Deputy Chief Executive Membor aro Rongrikkimgre-ni MDC Nikman Ch Marak parakatenba, Chokpot-o circuit house-ko chu·onga gita kuturirang gnang rike on·china a·dok sorkariko didiataha.
Marak-ni parakatani gitade, Chokpot-ko civil sub-division songahaoba aro ia sub-division-o C&RD Block baksana dingtang dingtang sub-divisional office-rang donggenchimoba ia biaprangona re·angenggipa dingtang dingtang dilgiparang aro sorkari officer-rangna dongchakani biaprang dongkujaengani a·sel neng·nikanirangko chagrongna nangrongengachim.
“Uni gimin Chokpot sub-division-oba chu·onga gita kuturirang donge aro gital cholrang donge circuit house-ko rikna gita tangka paisarangko chamchina anga mol·molenga,” ine GHADC-ni deputy CEM, a·dokni Chief Minister Conrad K Sangma-na sedoatgipa chittio parakataha.