TURA: Zikzak-ni Non-Tribal MDC Aktar Ali-ko GHADC-o Forest Advisory Committee-ni chairman songaniko dingtang dingtang NGO-rangni nangrime bikotskagipa All Garo Hills Joint Action Committee (AGHJAC) jegalatenba, ia MDC-ko kamoniko ra·galpilchina gita GHADC-ni Chief Executive Membor (CEM) Benedic R Marak aro Deputy CEM Nikman Ch Marak-ko didiangaha.
Tribal ong·gijagipa manderangko district council-o dilgipa dake songaniara Constituency-ni Sixth Schedule-o Tribal-rangko chel·chakna on·gimin niamko pe·ani gita ong·engani gimin uamang skangonin district council-o Tribal ong·gijagipa manderangko dilgipa dake songaniko raken jegalengachim aro Non-Tribal MDC-ko iandake district council-o Forest Advisory Committee-ni chairman songaniara namen kragijani ong·aha ineba AGHJAC parakataha.
“District council-o Tribal ong·gijagipa manderangni bak ra·paanian Sixth Schedule-o on·gimin niamrangko pe·ani gita ong·engachim aro iandake Non-Tribal MDC-ko Forest Advisory Committee-ni chairman songaniara Tribal-rangni bilko ra·sekani gita ong·aha,” ine AGHJAC-ni convenor Balkarin Ch Marak parakataha.
“Garo Hills-ni bol wa·arangko bang·bata changon Tribal ong·gijagipa manderangsa pale cha·enga. Forest department-ko nambate chalaina man·genchimode council-na bang·a man·gnirangkoba man·dapgenchim aro iachi GHADC-ko bilakbatatna man·genchim. Uni gimin iandakgipa kamrangko Tribal MDC-rangna on·genchimode forest department-ko nambate chalaina man·gen ine chinga bebera·a,” ineba AGHJAC parakataha.
Iani bidingo GHADC-ni CEM aro Deputy CEM-ko gronge agangrikon, uamang ta·raken nipile kamrangko chu·sokatna ku·rachakataha ineba AGHJAC-ni convenor parakataha.
Indake ong·engon, A·chikrangni niam bidikko rakkie donangna tarigimin Garo Customary Law (GCL)-ko ta·raken be·en pil·atchina aro GHADC-o Tribal ong·gijagipa manderangni bak ra·paaniko champengna man·na gita GHADC-na dingtang electoral roll-ko tarichina gitaba AGHJAC, GHADC-ni CEM-ko didiataha.
GCL-ko ta·raken niam pil·atchina gita CEM-ko didiangengon, Indian Constitution-ni Sixth Schedule-o Garo Hills-o songdongkamgipa Tribal-rangni aro mongsongbate A·chik jatni daka rikaniko ripinge rakkina gita GHADC-nan bilko on·manahani gimin A·chik jatni niam bidikko gimaatgija tange rakkina gitade ia GCL-ko ta·raken niam pil·atna nangchongmotengaha ine AGHJAC-ni convenor Balkarin Ch Marak parakataha.
GHADC-o dingtang electoral roll-ko ra·gatskachina gita didiangengon, da·alona kingkingan GHADC-o dingtang electoral roll dongkujani a·sel district council election-rangoba Parliamentary aro Assembly election-ni apsan electoral roll-rangko jakkalna nangenga aro iani a·selan Garo Hills-o songdongenggipa pilak jatrangan GHADC election-rango bakko ra·pana man·enga ine AGHJAC parakatenba, Sixth Schedule-ni ning·o district council-rangna on·gimin bilo pangchake GHADC-oba dingtang electoral roll-ko tarina nangchongmotengaha ine parakataha.