TURA: Re·anggipa Budbar salo, manderangna COVID-19-ni tikarangko su·na gita South West Garo Hills a·jani dingtang dingtang biaprango salsana mass vaccination drive-ko ong·atangaha aro ia mass vaccination drive-ko ong·atanio gimik sak 2399 manderang tikarangko su·e ra·rikna cholko man·aha.
South West Garo Hills a·jaoba COVID-19-ko man·giparang batroroengkuani gimin manderangna tikarangko su·e ra·na cholko on·na gita district administration, ia mass vaccination drive-ko dingtang dingtang biaprango ong·atangaha.
Tikarangko Rangsakona PHC, Betasing PHC, Zikzak PHC, Garobadha PHC, Nogorpara PHC, Kalaichar PHC, Mellim PHC, Belbari PHC aro Mahendraganj CHC-ni ning·o donggipa dingtang dingtang skul nok, Anganwadi centre aro community hall-rango su·e on·angahani gimin bang·bata manderangan an·tangtangni sepangbatgipa centre-rangona re·ange tikarangko su·e ra·rikna cholko man·tokaha.
Ia salsana ong·atanggipa mass vaccination drive-o tikarangko su·rikna man·gijagipa manderangkoba sepangbatgipa PHC ba CHC-rangona re·ange je somoioba tikarangko su·e ra·china gita district administration didiataha.
