TURA: Ia sal somoirango sabisirang giproroengani a·sel jinma tom·bimonganirangko ong·atna man·jaengani gimin re·anggipa June-ni 25 tariko, ki·tap serakgiparang, chatro chatrirang aro jatni ku·aganani aro sea jotanirangko namdapatna kam ka·enggiparangni tom·aniko A·chik Literature Society (ALS), internet gita ‘Google Meet’-ko ong·atangskaaha.
Internet gita tom·e agan-chanchigrikanio, A·chikrangoni ki·tap serakgipa saksa Pa Kroshnil D Sangma, ‘Katta Doka’ aro ‘Chera Sola’-ni gimin aganangaha.
Ia ‘Katta Doka’ aro ‘Chera Sola’-ni bidingo Pa Sangma talataniko on·angengon, Chera Solako ring·ao A·chik jat dol chi·gnini nangrimaniko aro jolni kri ku·sik agananio dingtange ring·aniko mesoka ine parakangaha. Ia Chera Solaniko Pa Sangma, dingtangmancha ‘Dimchrang’-ko doke ring·eba manderangna mesokangaha.
ALS-ni ong·atanggipa ‘Google Meet’-o Meghalaya Assam aro Bangladesh a·songoniba sak 100-na baten bakko ra·angtokaha.