SHILLONG: Meghalaya Energy Corporation Limited (MeECL)-ni gital chairman-cum-managing director (CMD)-na a·dokni Additional Chief Secretary Rebecca V Suchiang-ko songskaaha.
MeECL-ni CMD-na a·dokni ja·delbatsranggipa civil service officer-rangoniko seokchina gita opposition dolrang dabitokahani gimin a·dok sorkari, Additional Chief Secretary-ko MeECL-ni CMD-na songskaaha.
Sombar salo a·dokni Chief Minister Conrad K Sangma-ni kobor ra·timgiparangna parakatani gitade, MeECL-ni gital CMD-na songako man·gipa Rebecca V Suchiang-ara a·doko ja·delbatsranggipa officer-rangoni saksa ong·an baksana finance-ni kamrangkoba jako ra·e ka·enggipa official ong·ani gimin MeECL-ko nambate chalaina uan krabatgipa official ong·enga.
MeECL-ni gital CMD-ko songanichi salsanode dingtanganiko ba namdapaniko ra·bana man·jawa ine janapatengon, MeECL-ko nambate chalaina gita kam ka·giparangni gisepo meli nangrimani aro kamko ma·sigrikanichisa dingtanganiko ra·bana man·gen ine Chief Minister parakataha.
MeECL-ni gital CMD-na seokako man·gipa officer, gipin department-rangkoba nina nangenga ine sorkari ma·sichakengani gimin bakan MeECL-na CMD ong·kamnagipa mandeko sorkari sandigen ineba Chief Minister parakataha.
“Beben, MeECL-ni gital CMD-na songako man·gipa officer, a·doko saksa ja·delbatsranggipa officer ong·an baksana finance-ni kamrangkoba jako ra·e ka·enggipa mande ong·ani gimin MeECL-ni kamrangko nambate ka·dilna man·gen ine chinga ka·dongenga. Indiba ua gipin department-rangkoba jako ra·enggipa officer ong·ani gimin chinga uni kosako bojako galgopna gita nangnikjaenga aro bakan uni biapo chinga permanent CMD-ko sandie songe on·anggen,” ine Sangma parakataha.