SHILLONG: Meghalaya Energy Corporation Limited (MeECL)-o tangka jakkalsretanirangko aro gipin ong·gija kamrangko jakgitele am·sandiatchina gita opposition dolrangni dabiani ja·man da·o bon·kame a·dok sorkari, iandakgipa kamrangni bidingo tale am·sandichina gita inquiry commission-ko songe on·angaha.
A·dokni Chief Minister Conrad K Sangma-ni kobor ra·timgiparangna parakatani gitade, MeECL-o tangka jakkalsreta aro gipin ong·gija kamrangko ka·a ine matnanganirangko am·sandina gita sorkari commission-ko songe on·aha aro ia inquiry commission-na membor-rangko, judge-ko aro gipin committee membor-rangkoba songe on·manaha.
“Ia inquiry commission-ko chinga chu·gimik jakgitel ong·atna nangnike MeECL ba Power department-rango jak donggipa manderangkode rimnapjaha,” ine Chief Minister parakataha.
Koborko on·ani gitade, ia commission-ko gitcham judge saksa dilgen aro ia commission-o administration-ni membor sakgni, kamoni neng·takgimin officer saksa aro technical officer saksa donggen.
MeECL-ko a·bachengataoni batanggimin bilsi 10-na kam ka·anirangko, ia commission am·sandianggen aro inquiry-ko jagittamni gisepon matchotate report-ko on·anggen.