TURA: Assam a·dokoni koela badinggipa manderang, Meghalaya a·dokni koelarangko nangchongmotgipa lekka gri Bangladesh a·songona badingatenga ine Dalu jolni mande saksa police-rangna badi ka·doangaha.
Dalu Koinadubi-oni saksa John Dalton Sangma minggipa mandeni police-rangna badi ka·doangani gitade, ia bilsio March 28 tarikoni April 23 tarikona, Assam Dudnoi-oni M/S Maruti Fuels minggipa koela company, niam gri bol 450 koela garirangko Bangladesh a·songona watatahachim.
Ia mandeni FIR-o janapani gitade, Guwahati Beltola-oni Kuldeep Bansal, Maruti Fuels company-ni Balwan Singh aro Bittu Coal company-ni Dharamvir Mehta minggipa manderang, niam gri koelarangko badingengachim.
Ia manderang, koelarangko Nongalbibra jolo donggipa Jadigittim-onikosa salbaenga indiba uamng Dudhnoi-onikosa ra·baenga ine pa·sikenba, Gasuapara-o donggipa land customs station- e-way bills-ko mesoke Bangladesh-ona salangenga ine Sangma badi ka·doangaha.
Antignimangna skangsan ia manderang, Jadigittim-oniko Gasuapara-onaba koelarangko salbana jotton ka·ahachim indiba uamangni koela salbaaniko jegalani ja·man champengatpilna man·aha ineba ua parakataha.
Koborko on·ani gitade, Dudhnoi-oni Gasuapara-ona truck garirangni koela salbaanikode nika dongjachim indiba ia NH-62 rama gita ritchani ritcha truck garirangni bangbang South Garo Hills-chipakna re·baakode nikskana man·engachim.
Indake ong·engon, South Garo Hills a·jaoniko niam gri Bangladesh-ona koela badinganirangko am·sandienba niam gri koela badingenggipa manderangni kosako rakgipa ja·kurangko de·china Sangma, police-rangko didiataha.