‘Support for Producers Group’-ni ning·o game ge·e cha·giparangna sorkari dakchakgen: CM

TURA: Sukrobar salo, Meghalaya a·dokni Chief Minister Conrad K Sangma, North Garo Hills a·jaona re·baenba, game ge·e aro bading chiwale cha·enggipa manderang baksa tom·aniko ong·atangaha aro ia tom·anio Williamnagar-ni MLA Marcuise Marak baksana Kharkutta-ni MLA Rupert Momin-ba dongpae bakko ra·angaha.
Ia tom·anio a·dokni Chief Minister, game ge·e cha·giparangna aro bading chiwalgiparangna aganprakangengon, Chief Minister-ni ‘Support for Producers Group’-ni ning·o game ge·e aro bading chiwale cha·giparangna sorkari dakchakanirangko on·gen ine parakangaha.
Garo Hills-o game ge·e man·gipa ma·manti ong·telaigipa bosturangko tang·doatna gita sorkari kamko ka·enga ine janapatengon, Chief Minister-ni ra·gatgipa ‘Support for Producers Group’-ni ning·o sorkari, gama ge·ani aro bading chiwalani kamrangko tang·doatna tangka paisarangko on·e dakchakgen ine Conrad Sangma parakataha.
Mendipathar-o kulina sienggipa ‘Mega Food Park’-ni gimin talataniko on·angengon, cha·anirangko tarianichi game ge·e man·gipa bosturangko tang·doatna gita ma·mong sorkarini Food Processing Ministry, ia Mega Food Park-ko North Garo Hills a·jana on·ataha ine Chief Minister parakataha.
A·doko game ge·e aro bading chiwale cha·giparangna dingtang dingtang janggi tangani cholrangko on·na man·na gita sorkari, bosturangko pack ka·na aro bazar-ona sokatna dakchakgen ineba Chief Minister parakataha.
Chief Minister-ni parakatani gitade, ia bilsini gisepo, dol 25000 producer group-rangna ‘Support for Producers Group’-ni ning·o sorkari, tangka paisarangko on·e dakchakanggen.
“Ia Support for Producers Group-ni ning·o game ge·e aro bading chiwale cha·giparang, an·tangtangni kamrangko tang·doatna man·na gita sak 10 donggipa dolrangoni sakprakna gong 5000/-ko on·gen,” ine Chief Minister aganaha.
Ia tom·ani ja·mano a·dokni Chief Minister, Mendipathar-o kuligipa Mendipathar Multipurpose Cooperative Society-koba niangjolaha.
Ia Mendipathar  Cooperative Society-ko Sister Rose, bilsi 20-na skangan bikotdile, game ge·e cha·enggipa aro self help group (SHG)-rangni kamrangko tang·doatna kam ka·engachim.