SHILLONG: Meghalaya a·dokni East Khasi Hills-o Covid-19 sabisiko man·giparang bang·engkuani gimin district administration champenganiko mijalo ra·gatdapataha.
Indake, East Khasi Hills-o, CrPC 144-ko ra·gate ge·etatani gitade,”District-o Covid-19 sabisini obostarangko nipiltaie nianio sabisiko man·giparangni nombor namen tang·doe dongkuenga ine nikna gita man·a aro positivity rate 10%-ni kosako dongkuenga”.
Uni gimin,”District-o Covid-19 sabisini bilongbee batroroaniko champenge naljokaniko on·na gita,” East Khasi Hills-ni district magistrate Isawanda Laloo, Section 144 CrPC-ni niamrango aro Meghalaya Epidemic Diseases, COVID-19 Regulations, 2020-ni Regulation 3-o pangchake champenganiko Sonibar-oni ra·gatdapatenga ine ge·etanio mijalo u·iataha.
Ge·etatani gitade, walni curfewko Section 144 CrPC-ni niamrango pangchake attam 7 bajioni pring 5 bajiona Meghalaya-ni East Khasi Hills district-o ra·gatataha aro ia changode re·a doani aro gari-gora salaniko chu·gimik champengataha.
Curfewni somoirango bil man·a gri gari-gora-rangko sala aro rea doanirangko dakgiparangko rim·a man·ode niamrango pangchake dai gamna nanggen aro sastiko man·gen, ine ge·etanio aganaha.
Political, jinma aro toromni bidingrango tom·bimonganiko champengatkua, uarangoni conference, jinma tom·dake chanchirimani, training, bia ka·ani aro kal·susaani dakgiparangko da·o dipet champengatkuenga.
Inter-district re·ruraanikoba aro Shillong-oni gipin district ba a·dokrangonaba bilko man·gijade re·ruraaniko champengata, indiba jinmana nangchongmotgiparangkode re·rurana gita rai on·a.
Bilko man·gija salenggipa private garirangko rim·a man·ode niamrango pangchake ja·ku de·anirangko dakgen.