SHILLONG: Hill State Peoples’ Democratic Party (HSPDP), ia jani gisepo Union Home Minister Amit Shah-ni Meghalaya-ona wenbaani somoio, a·doko Inner Line permit (ILP) system-ko ra·bana dabiani bidingo nambate agan-golpogrikna gita chol ong·jolgnok ine an·tangtangni ka·dongsoaniko parakaha.
“Ua an·chingni dabianirangko knachakgen aro namgipa kattachi aganchakgen ine chinga ka·donga aro bebe ra·a. Ua miksongani gnangsa Meghalaya a·dokona wenbanasienga,” ine HSPDP chief KP Pangniang mni Surkrobar salo parakataha.
A·doko ILP-ko ra·gatchina dabiangana agreba, HSPDP, a·songni niam-bidik (Constitution)-o donggipa Chetgipa Schedule aro Dokgipa Schedule-rangko taridapanichi Meghalaya-ni mongsonggipa ku·sikrang, chong·motan Khasi aro Garo ku·sikrangko office-rango jakkalna choligipa ku·sikrang dake ra·chapchina gitaba dabianiko dakangjolgen ine parakaha.
Uni aganangkuani gitade, a·songni niam-bidiko donggipa niamrangko taridapanichi, a·doko songdonggipa manderangko a·gilsakni niamni gita bil gnangdapatna nangenga. Maina, “da·o dipet, a·dok sorkari, a·arangko man·rikani bil ba niamrang dongkujaengachim.”
Uandake, ILP-ko dabiani bidingo aganatkuengon, “ia mamlani bidingo mikkangchi jako ra·e dabianiko dakangkuna ine Meghalaya Legislative Assembly niamrangko pas ka·aha. Iana dabianio gimik political party-rangba bakko ra·paenga,” ine aganaha.
Indake ong·engon, “chinga iani bidingo Union Home Minister-ko grongna aro una lekka sedoangna gitaba hukumko bi·manaha,” ineba ua agandapaha.
