TURA: West Garo Hills a·jani Bhaitbari Higher Secondary School-o skigiparang, kam ka·giparang aro bilsi 18 batgimin chatro chatrirang, COVID-ni tikako su·e ra·mantokahani gimin a·jao tika su·gimin skulrangoni skanggipa skul ong·aha ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, COVID sabisiara skulrango poraienggipa bi·sarangna kenchakna nangani ong·batengani gimin district administration, dingtang dingtang skulrango tika su·aniko a·bachengatna gitaba tik ka·angaha.
“Ian skulrango kam ka·enggipa aro poraienggiparangnaba kenchakna nangani ong·engani gimin chinga skulrangoba tikarangko su·na manchiangaha aro bilsi 18 batgimin chatro chatrirang, jemangan COVID-ni tikako su·e ra·tokkujaengachim, uandakgipa chatro chatrirangko sandie biming segatchina gita chinga pilak skulrangna ge·etaniko on·atmanaha,” ine West Garo Hills a·jani Deputy Commissioner parakataha.
Skulrango poraienggipa chatro chatrirangna aro uamangni ma·a paarangna ia tikarangko su·e ra·na nangani bidingo agan-talate on·na nangengani gimin West Garo Hills a·jani Deputy Commissioner Ram Singh, doctor-rang baksa a·jani dingtang dingtang skulrangona re·ange, iandakgipa program-rangko ong·atchina didiangaha ineba u·iataha.
“Tika su·kugijagipa chatro chatrirang aro ma·a paarangko sandie bimingrangko segatmanahaon, skulrango dingtangmancha tika su·ani program-rangko ong·atanggen. An·ching pilakan tikako su·e ra·tokgenchimosa naljokbate dongna man·gen,” ine Singh parakataha.
