TURA: Gitcham Congress sorkarini somoiosa kajinarangko giljani a·sel Meghalaya a·dok krorni kror tangkarangko gimaatna nangaha ine Mongolbar salo National People’s Party (NPP) matnangataha.
NPP-ni ku·wattimgipa aro MDA sorkarini Chief Whip Marcuise Marak-ni parakatani gitade, Congress sorkarini somoio kajinarangko giljahani a·sel a·dok krorni kror tangkarangko gimaatna nangahachim CAG baksana departmental report-rangoba Congress sorkarini bang·a kamrangon chu·sokgijanirangko nikna man·ahachim.
“Da·o NPP-chi dilenggipa MDA sorkari, gamgija donchipgipa kajinarangko man·pilna rakbee kamrangko ka·engon, a·dokni gitcham chief minister Mukul Sangma, Congress sorkarini chu·sokgijanirangko MDA sorkario galgopna jotton ka·skaenga. Uni gimin ia sorkariko matnangna skang, Congress sorkarini a·dokna tangka paisani gita neng·nikanirangko donanggipani gimin ua nichengna nanga,” ine Marak, Mukul Sangma-ko matnange parakataha.
MDA sorkarini somoio kajinarangko gile man·ani Congress sorkarini somoiona bate changni chang batengaha ine janapatengon, Congress sorkarini koelaoniko man·gipa kajinarangba NGT-ni champengatani ja·man man·dapani dongsrangjaha indiba MDA sorkari, dingtang dingtang cholrangchi a·dokna man·dapanirangko ra·bana kam ka·skaaha ine NPP-ni ku·wattimgipa parakataha.
“2020 bilsio MDA sorkari, State Taxation Acts-ni ning·o Meghalaya Settlement of Arrears Act-ko ra·gataha aro darangba kajinarangko gamgija jokjana gita department rake kamko ka·aha. Mukul Sangma-ni mamingkoba ma·sichenggija matnangenggipa One-Time Settlement Scheme (OTS)-chiba kajina gamgijagipa manderangna 70 percent-ko gamate 30 percent-ko watna cholko on·aha. Uni gimin Congress sorkarini somoio kajinarangko gamna man·gijagipa manderangba da·o kajinarangko gamna a·bachengtokaha aro uandaken department, dal·dale kajina gamgipa sak 50 manderangchi gong kror 9.66 kajinarangko man·pilaha,” ine Marak parakataha.
NPP-ni parakatani gitade, da·o gong kror 19.75 kajinarangko man·kuna nangenga aro kajina gamgiparangna department, kajinarangko gamna somoirangko on·atmanaha.
Congress sorkarini somoio a·dokni petrol pump-rangonikoba kajinarangko giljahani a·sel a·dok bang·en noksan ong·na gita nangaha ineba NPP-ni dilgipa parakataha.
“India a·song gimikon sorkarirang, Petrol aro VAT-chisa kajinarangko bang·bate man·ronga indiba Mukul sorkarini somoio petrol pump-rangoniko kajina giljaha. Da·o ia sorkari kakketko sandie man·na nangkuenggipa kajinarangko gilna a·bachengon a·dok gimiko donggipa dam 229 petrol pump-rangoni dam 58 petrol pump-rangsan gamna nangkuenga aro uamangoniko gong kror 5.91 tangkarangko man·aha,” ine Marak parakataha.
