SHILLONG: Ma·mong sorkarini ra·gatgipa Saubhagya Scheme-ko Meghalaya a·doko jako ra·e ka·aniko Comptroller & Audit General (CAG)-ni am·sandianio gong kror 149 tangkarangko gimaataha ine ma·sina man·aha.
CAG-ni report-o parakani gitade, ia Saubhagya Scheme-ko a·dokni Power department, Delhi-ni company-na on·anichi gong kror 149.12 tangkarangko noksan ong·ataha.
Ia scheme-ni ning·o Delhi-oni M/s Satnam Global minggipa contractor-rangni ra·bagipa transformer-rangba bostu namgijagipasa ong·e da·o bang·bata transformer-rangkon tarina gita Guwahati workshop-o donna nangengaha ineba CAG-ni report-o parakaha.
Kobor on·timgiparangni u·iatani gitade, ia Saubhagya Scheme-ni ning·o Khasi aro Jaintia Hills jolrangon lak 1.60 nokdangrang namgnirangko man·china donsoahaoba aro da·o 30,000 nokdangrang bijolirangko man·tokkujaengoba ia scheme-ko bon·atna jotton ka·ahachim indiba ia scheme-ko bon·atna gita a·dokni officer saksa soi ka·na jechakahani gimin Power Secretary aro MeECL-ni CMD-ko apsan salon kamoniko ra·galskaahachim.
India a·songo songdongenggipa pilak nokdangrangnan bijolirangko sringe on·na man·na gita ia Saubhagya Scheme-ko India sorkari, 2017 bilsini October jao a·bachengatahachim aro ia scheme-ko ra·na gita Meghalaya sorkariba 2018 bilsini March jao soi ka·ahachim.
