SHILLONG: Shillong songjinmani Mawdiangdiang-o rikenggipa Meghalaya Legislative Assembly-ni gital nokko matchotangengahani gimin ia gital Assembly nokko mikkang bilsini Budget Session-na skangde matchotna ka·dongenga ine Meghalaya Assembly-ni Speaker Metbah Lyngdoh parakataha.
Lyngdoh-ni parakatani gitade, ia Assembly nokko rikani bang·bata kamrangan matchotengaha aro da·o main hall-san bangki dongaiahachim.
“Assembly-ni gital nokko rikani kamrang ta·rakengaha aro Assembly-ni changgipin session-kode gital Assembly noko ong·atna man·naba gnang,” ine Assembly-ni Speaker Metbah Lyngdoh parakataha.
Ia Assembly nokko rikani bidingo ua re·anggipa July-ni 2 tariko tom·e chanchirimangaha aro ia Assembly nokni mongsonggipa hall-na agrede bang·bata kamrangkon matchotmanaha ine Lyngdoh aganaha.
Ia sal somoirango COVID-19-ni giproroaniko champengna lockdown-rangko ra·gatenganichi kam ka·gipa manderang chu·ongjaengoba kamrangko ta·raken matchotangengaha ineba Assembly-ni Speaker parakataha.
“Re·baenggipa 2022 bilsini Budget Session-ko ia gital Assembly noko ong·atna man·na gita chinga kamrangko ta·raken matchotatna jotton ka·enga,” ine Lyngdoh aganaha.
Meghalaya Legislative Assembly-ni gitcham nokko 2001 bilsio wa·al kamgopaoni da·o bilsi 20 batangpilengahaoba gital building-ko da·onan man·kujaengachim.
Meghalaya a·dokni dingtang dingtang sorkarirang, Assembly-ni gital building-ko rikna gita dingtang dingtang biaprang jekai Police Bazar, Mawdiangdiang, Upper Shillong aro Tara Ghar-ko minge donahaoba da·o ia building-ko Mawdiangdiang-o rikskaengahachim.