TURA: Garo Hills-o BJP-ni bang·bata dilgiparangan Meghalaya a·dokni dilgipako dingtangatchina nangnikenga ine a·dokni gitcham minister aro BJP-ni dilgipa KC Boro-ni agananiko Tura-ni BJP MDC Bernard N Marak jegalatenba, Boro an·tangan BJP-ni kosako kamko ka·gipasa ong·ani gimin Garo Hills-ni bang·bata BJP dilgiparangan uko doloniko ra·galchinasa nangniktokenga ine parakataha.
Meghalaya a·doko BJP-ni state president-ko dingtangatani bidingo Garo Hills-ni pilak BJP dilgiparangan, AL Hek-ko gital state president-na chakpaaniko on·gen ine adita salrangna skangsan Boro parakatahachim ine nikna man·a.
Indake ong·engon, Boro-ni iandake parakatgipa kattarangko Tura-ni BJP MDC jegalatskaenba, da·o dipet BJP-ni state president-ko songani bidingo Garo Hills-ni dilgiparang ku·rang on·na dongkujachim ine talataniko on·angskaaha.
“Dr KC Boro-ni iandake parakaniara BJP dolko bak dakna jotton ka·ani gitasa ong·engani gimin uni agangipa kattarangko Garo Hills-ni BJP dol raken jegalenga. Garo Hills-o BJP-ni dilgiparang, Morcha aro gitcham MDC-rangni u·iatani gitade iani bidingo Boro darangnaba u·iatchengjaha. Dilgipako seokani kamde BJP high command aro ma·mongo BJP-ko dilgiparangni kamsa ong·a aro ua (Boro), an·tangni kattarango Garo Hills BJP-ko ra·na nangja,” ine Marak parakataha.
KC Boro, BJP-ni kosako kamko ka·ahani gimin Garo Hills-o BJP-ko dilgiparang uni kamo kusi ong·niktokjaenga aro uko BJP doloniko ra·galchina nangniktokenga ineba Tura-ni BJP MDC parakataha.
