“Chinga mikrake donganiko komiatna nangnikkujaenga indiba porikka ra·e nianiko chinga komiatahaon COVID man·giparangko an·ching nikna man·jawaha. Chin donggipa manderangko re·rurana on·genchimode COVID giprorotaina kenchakanirang dongenga. Uni gimin man·a dipetde chinga porikkarangko ra·e niangkuna nangaigen,” ine Mongolbar salo, Health department-ni Principal Secretary Sampath Kumar parakataha.
COVID-19-ara asolan ong·a ine talatangengon, bang·bata a·dokrangon COVID-19 dongjaha ine chanchichipe dal·a gualaniko dakrongenga ine Kumar parakataha.
Meghalaya a·doko niamrangko ra·gatanichi aro kenchakna nanggipa manderangko porikka ra·e nianichi bewalan COVID-19-ko champengna man·aha ineba Health official parakataha.
“Porikkarangko ra·e nijagenchimode an·chingo COVID man·giparangko nikna man·jawachim. Skanggipa aro gnigipa changna COVID giproroanioba an·chingo sabisiko man·giparang dongachim. Ia dingtangna man·gipa jo·ongko an·chingo adita somoirangni ja·manosa man·aha aro manderangni gisepo kenjagokaniko ong·kataha. April aro May jani gisepo an·ching ia sabisini giproroaniko nikna man·bataha aro da·o chinga jo·ongko gimaatna gita nangchongmotgipa biaprango porikkako ra·e nienga maina porikkako ra·e nianichisa manderangna mikrakataniko on·na man·enga,” ine Health department-ni Principal Secretary parakataha.
Badiaba badiaba biaprangode da·oba porikkarangko ra·e nina siktokkujaenga ine janapatengon, porikkarangko ra·e niangkugenchimosa COVID man·giparangko komiatna man·gen ine Kumar parakataha.
Kumar-ni aganani gitade, Ri Bhoi a·jao manderang, ta·raken sannaniko ra·na re·bae nampilna gita man·tokenga indiba West Khasi Hills a·jaode da·oba bang·bata manderangan sannanirangko ra·na re·batokjaengachim.
“Manderang bang·batan COVID-19-ko sanna man·a ine ma·sitokengaha aro ian an·chingna namgipa kobor ong·chongmota,” ine ua aganaha.
A·doko COVID man·giparang bang·kuengoba sianide komiangengaha ineba Health official parakataha.
Indake ong·engon, saanirang gnang COVID-19 man·gipa manderangko sanna gita da·o Nazareth Hospital, Bethany Hospital aro Supercare Hospital-rango PICU-rang dongaha ineba Kumar parakataha.
