TURA: South Garo Hills a·jani Rongara-ona dakanggipa ramako tarina nanggitikengani gimin ia ramako adita salrangna chipe donatchengaha ine Budbar salo South Garo Hills a·jani District Administration parakataha.
South Garo Hills a·jani Deputy Commissioner FM Dopth-ni u·iatani gitade, Rongara-o donggipa bolni dolongko tarigitikna nangengani gimin ia ramako salsnina, chong·motan July 8 tarikoni July 15 tarikona chipe donatchengenga.
Batanggimin sal somoirango mikkarang dontonggija waangahani a·sel South Garo Hills a·jao bang·a rama jal·langrangan nosto ong·atako man·angtokahachim aro mitam bolni dolongrangkode chirang pe·angahachim.
