SHILLONG: Meghalaya a·doko da·o COVID-19-ko man·giparang adita komiangahaoba mikrake donganiko komiatkujachina gita a·doko songdongenggipa manderangko sorkari didiataha.
Health Services (MI)-ni Director Dr Aman War-ni parakatani gitade, a·doko da·o obostarang adita namkalbataha aro batanggimin somoirangko tosusae nigenchimode a·doko COVID-19 man·giparang komibatengahachim.
“Ia pilakan kenchakna nanggipa manderangko sandie porikka ra·e nianio positive ong·engani a·sel ong·enga. Positive ong·gipa manderangko man·osa, chinga uamangna sanna bannanirangko on·e sabisini giproroaniko champengna man·gen,” ine Dr War parakataha.
Meghalaya a·doko da·o obostarang namkalengahaoba mikrake donganiko dongtongkujawa ineba Dr War aganaha.
“Iana bate obostarang namkalkuja dipet chinga batanggimin somoirango jekai mikrake kamrangko ka·engachim, apsan daken kamrangko mikrake ka·angkugen,” ine ua aganaha.
COVID-19 man·ani ba positivity rate-ko komiatna nangengani gimin janapatengon, ia positivity rate-ko komiatna gita bang·bata manderangkon porikka ra·e niangkuna nanggen ine Health Services-ni Director parakataha.
“Je manderangkon porikka ra·e nichina aganachim, ua manderang positive ong·enganiara namgipa chin ong·a maina manderang positive ong·genchimosa chinga sanna bananirangko on·e ia sabisini giproroaniko champengna man·gen,” ine Dr War aganaha.
Indake ong·engon, gittamgipa changna COVID-ni giproroaniko champengna gitade mask-rangko ganjringna, saksa sakgipinoni chel·tanggrike dongna aro rongtal an·taljringe dongna nanggen ineba Dr War parakataha.