SHILLONG: Mairang-ko gital district songna parakatani ja·man da·o Mawsynram block-koba civil sub-division songchina dabitokengani gimin Bristibar salo Mawsynram-ni Congress MLA HM Shangpliang, a·dokni Chief Minister Conrad K Sangma-ko gronge agangrikangaha.
Chief Minister-ko grongeani ja·man kobor ra·timgipa manderang baksa agangrikengon, Mawsynram block-oni East Khasi Hills a·jani headquarter Shillong songjinmaona aditan chel·grikani gimin jolni manderang dingtang dingtang kamrangna re·ruraanirango neng·nikanirangko man·tokna nangenga ine nikenba, Mawsynram-ko civil sub-division songani bidingo ua Chief Minister baksa agangrikangaha ine Shangpliang parakataha.
“Angni Chief Minister baksa agangrikani kraa gitan chu·sokgipa ong·aha maina Mawsynram-ko civil sub-division songchina dabianiara kraani ong·enga ine ua angna aganaha. Iani bidingo ua nipiltaienba, nangani kri kamko ka·na gita angna ku·rachakataha,” ine Mawsynram-ni MLA aganaha.
Chief Minister-ko grongeani somoio ua Mawsynram-ko civil sub-division songchina dabie segipa chittikoba on·angjolaha aro uni talate on·anirangko Chief Minister namen knachakaha ineba Shangpliang parakataha.
Meghalaya a·doko Mawsynram block-an gitchambatsranggipa block ong·a maina ia block-ko 1958 bilsio Meghalaya a·dokko man·na skangan Assam sorkari songe on·aha ine adita salrangna skangsan, Mawsynram-ko civil sub-division songchina dabienggipa dolrang parakatahachim.
Mawsynram-ko sub-division songani bidingo Shangpliang, Conrad baksa agangrika
Date:
Share post:
