WGH-o sak 6 cholgri manderangna ID-rangko on·a

TURA: West Garo Hills a·jao sakdok bi·ame cha·giparangko Tura-ni DC office-o donggipa Aadhar Enrolment Centre-ona rimbaenba ID-rangko on·angaha.
West Garo Hills a·jani Deputy Commissioner Ram Singh-ni u·iatani gitade, ia bi·ame cha·giparangni gimin ning·tue sandichengenba ID-rangko on·gen aro ID-rangko man·ahaon uamang sorkarini dingtang dingtang scheme-rangko ra·pana man·gnok.
Ia sakdok bi·ame cha·giparangoni sakgnide bi·sa donge mikgri ong·gipa jiksesa ong·achim.
“Ia bi·ame cha·giparangni bidingo kakketko sandiani ja·man ID-rangko on·anggen. Uamangni man·na nangenggipa scheme-rangko da·o uamangba man·pagnok. Uamangna Officers Club-ni gitaba adita jani cha·ani ringani bosturangko on·atjolenga,” ine Ram Singh parakataha.
Re·anggipa jaosan West Garo Hills a·jani district administration, sorkari office-rango kam ka·eba NFSA-ni ning·o on·enggipa PHH aro AAY card-rangko jakkalenggipa manderangko, an·tangtangni card-rangko on·pilchina ge·etaniko on·manahachim.
Deputy Commissioner-ni u·iatani gitade, PHH aro AAY card-rangkoa sorkari, kangal cholgrirangnasa ra·gatahani gimin sorkari office-rango kam ka·giparangde man·ani ong·jachim.