TURA: Sukrobar salo West Garo Hills a·jani District Administration, District Telecom Committee baksana Tura-o donggipa dingtang dingtang development committee-rang aro NGO-rang baksa tom·aniko ong·atangenba, ia sal somoirango mobile network-rang namsrangjaengani gimin chanchirimangaha.
West Garo Hills a·jani Deputy Commissioner Ram Singh-ni u·iatani gitade, Garo Hills-o aro mongsongbate Tura jillao dingtang dingtang network service-rang aro mongsongbate Jio aro Airtel network-rang namsrangjaengani gimin ia network-rangko nambate on·china ge·etaniko on·ataha.
Tura-o mobile network-rangko nambatatna gita ia company-rangni nangnikanirangko janapatengon, ia network company-rang, Tura jillani Dakopgre, Rongkhon Songgital, Babupara, Mondol Tilla, Akonggre, Sherwood School samba jolrango aro Darechikgre jolrango mobile tower-rangko songdapna nangnikengachim indiba ia jolrango songdongenggipa manderang tower-rangko songna on·jaengani a·sel neng·nikanirangko chagrongna nangenga ine Deputy Commissioner parakatenba, ia jolrango tower-rangko songna on·china jolo songdongenggipa manderangko mol·molataha.
Tower songgipa biaprango a·a nokgiparang generator-rangko chalaina on·jaengani a·selba network-rangko name man·jaenga ineba Deputy Commissioner talataniko on·angaha aro a·a nokgiparangko iani bidingo talate on·enba didiskachina jolo songdongenggipa manderangko aro dingtang dingtang NGO-rangko didiataha.
Jillarangona bate songadam nokadamrango bijolirang tik ong·batrongjani gimin tower-rango generator-rangko somoi gita jakkalna on·china ua a·a nokgiparangko didiataha.
Apsan daken, tower songgipa company-rangkoba, manderangna maming namgijaniko ra·bajana gita dongimin niamrangko ja·rikchina gita Deputy Commissioner didiataha.
