DADENGGRE: Meghalaya sorkario da·o ong·enggipa I&PR, Power, Taxation-ni Minister, James P. K. Sangma mni Sukrobar salo Dadenggre Civil Sub-Division-ni Sub-Divisional Officer, Jagdish Chelani-ni uni office Conference Hall-o da·ororo a·jao ong·enggipa obostarangni bidingo mikkangchi apsan ba ku·cholsan kamko ka·na miksonge tom·e chanchirimanio salni dal·batgipa sokgipa ong·e bakko ra·angpaaha.
Sangma, ua tom·e chanchirimanio da·ororo wachi-kari sokr mikka jimbeani a·sel, rama-jal·angrang nosto ong·ani, covid-19 sabisiko nirok-simsake kamko ka·ani aro uandakgipa a·jao dingtang dingtang nangchongmotgipa kamrangko ka·na nangengani bidingo mikkangchi apsan ba ku·cholsan ong·e kamko ka·na miksonganiko namnikenba an·tangni bil ama dipet ua pilakni bidingo a·dok sorkari baksa agangrike kamko ka·achi dakchakanirangko on·a gita ku·rachake ra·angaha.
Ua tom·e chanchirimani somoio, minister, ia nambegipa aro dakna nanggnigipa kamko a·bachengdilengani gimin SDO (C)-ko mittelpile aganengon, iandakgipa kamrangko nirokna aro namgijagipa obostarangko namdapate jolo ba a·doko iandakgipa obostarangchi neng·nikenggipa manderangna dakchakaniko on·a nangchongmota ineba ua agandapaha.
Jolo ba a·jarango iandakgipa tanggitik obosta ong·ani somoio namgniko ra·bae on·a nangengani bidingo aganengon, minister, iarangni bidingo dake mesokchina ba (mock exercise)-rangkoba ong·atchina SDO (C)-ko agan-ku·pattianirangko on·aha. Maina iarangko dakanichi Incident Response Team (IRT)-ni gita mikkangchi u·i-ma·sie ra·na aro obosta ong·ani somoio altue kamko ka·na man·gen.
Minister, a·jao Covid-19 management-ni bidingo aganengon, tika su·anichisan a·jao ba a·doko skang gita ramram ong·e janggi tangani cholko ra·bapilna man·aignok ine ua manderangko an·tangtangan re·mikkange sabisini tikarangko su·tokchina gitaba didiangjolaha.
Indake ong·engon, ua manderang an·tangtangan sabisini tikarangko su·na re·mikkangbachina ine ka·donganiko on·e didiatchina gitaba officer-rangko didiatskaengon, “an·ching songsalo sabisina tika su·ani biding ong·gija dake bebe ra·ani aro ong·gija jangbingbanganirangko galna nanggen,” ineba manderangna didianiko on·angjolaha.
