SHILLONG: Re·anggipa Robibar walo, East Jaintia Hills a·jani Dkhiah West jolo gari bolsa, petrol pump sambao park ka·e donenggipa truck gario su·gake a·sel ong·aha aro ia a·sel ong·anio mande sakgni so·otako man·aha aro sakgipin bilongbee saknaanirangko man·na nangaha.
Koborko on·ani gitade, ia a·sel ong·anio sianggipa mande sakgnioni saksade Hynniewtrep Achik National Movement (HANM) Eastern circle-ni president Edwin Syrti aro sakgipinde Meghalaya Police-ni constable John Michael Khongsit ong·achim.
Gari a·sel ong·anio saknaaniko man·gipa mandeba police constable ong·achim aro uko Minal Banti Majaw mingskaachim ineba kobor on·timgiparang u·iataha.
Saknaa man·gipa mandeko sanna gita bakan Khliehriat CHC-ona ra·angaha.