SHILLONG: Robibar saloni Sombar salona konta 24-ni gisepo Meghalaya a·dok gimiko sak 273 manderang COVID-19-ko man·daptaiaha indiba apsan salon sak 523 manderang ia sabisioni nampilskaahani gimin man·dapgiparangna bate nampilgiparang batskaaha.
Sombar salo COVID-19 man·dapgipa sak 273 manderangko channe da·o Meghalaya a·dok gimiko COVID-19 man·e dongenggiparang gimik sak 4110 gapaha aro ia apsan salon mande sak 5 COVID-19 man·e siangdaptaiahani gimin a·dok gimiko COVID man·e sianggiparangara gimik sak 913 gapskaengaha.
Sombar salo positive ong·gipa sak 273 manderangoni sak 7-de East Garo Hills-o, sak 3-de East Jaintia Hills-o, sak 98-de East Khasi Hills-o, sak 13-de North Garo Hills-o, sak 55-de Ri Bhoi a·jao, sak 8-de South Garo Hills-o, sak 2-de South West Garo Hills-o, sak 51-de West Garo Hills-o, sak 4-de West Khasi Hills-o aro sak 32-de West Jaintia Hills a·jao ong·a.
Konta 24-ni gisepo COVID man·e sianggipa sak 5 manderangoni sak 3-de East Khasi Hills-o, sak 1-de South Garo Hills-o aro sak 1-de West Garo Hills a·jao ong·a.
Ia apsan salon gimik sak 523 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 49,830 gapskaengaha.