SHILLONG: Gittamgipa changna COVID-19 giprorotaina kenchaksoanirang ong·engani gimin a·dok sorkari, bilsi 18 batgimin manderangko October jani gisepon matchote tika su·e ra·na miksongenga.
A·dokni Chief Minister Conrad K Sangma-ni parakatani gitade, gittamgipa changna COVID-19 giprorotaina kensona nanganirang dongengani gimin sorkari, tika su·aniko ta·rakbatatna manchiaha aro uandaken da·o jagni ba jagittamni gisepode tika su·e ra·na chol man·enggipa manderangko matchote tika su·na miksongenga.
“Bilsi 18 batgimin manderangko September jani bon·angachibara ong·jaode October jani a·bachengachibara matchote tika su·na nangengaha aro iana an·ching salprakon komibeoba sak 20,000-oni sak 25,000-kode su·na man·na nangengaha,” ine Mongolbar salo, Prime Minister Narendra Modi baksa video conference gita chanchirimangani ja·man Chief Minister parakataha.
A·dokni bang·bata biaprangon da·o COVID man·ani percentage 10 percent-na bate komibataha indiba a·ja damgniode COVID man·ani 10 percent batengkua ineba Chief Minister parakataha.
Meghalaya a·doko tika su·aniko ta·rakbatatna nangenga ine janapatengon, kamrangko nambatatna gita sorkari, dingtang dingtang dilgiparangni aro dolrangni dakchakanirangkoba bi·ataha ine Sangma parakataha.
“Tika su·aniko ta·rakbatatna gita chinga MLA-rangko, MDC-rangko, dingtang dingtang songni nokni dilgiparangko, toromni dilgiparangko aro dingtang dingtang dolrangkoba sorkari baksa bakrime dakchakanirangko on·china mol·molataha aro anga bebera·a da·o mikkang salrangode an·chingo tika su·ani bewalan tang·doanggnok,” ine Chief Minister aganaha.
Indake ong·engon, a·doko pilak nanganirangko dakchake on·engani gimin aro dingtang dingtang a·jarangna oxygen plant-rangkoba on·atahani gimin ua, ma·mong sorkariko aro a·songni Prime Minister Narendra Modi-koba mittelpilangaha.