TURA: South Garo Hills a·jani Siju jolo me·tra saksa, bilakbegipa bijolini krongo gadoe an·tangko so·otna jotton ka·ahachim indiba rasong gnange ua songo bijoli dongjaenba uko jokatna man·aha.
Koborko on·ani gitade, ia a·sel ong·ani Sombar pringo Siju songo ong·aha aro ia me·chik bi·sa, an·tangni ma·a paa baksa kajia ong·ani ja·man an·tangko so·ote sina jotton ka·ahachim.
“Chingna u·iatani gitade, ia me·chik bi·sa an·tangni pagipa baksa maibani gimin kajia ong·e an·tangko so·ote sina ia bijoli krongo gadoahachim. Koborko man·soa bakan police-rangba ua biapona re·angaha aro songni manderang baksa uko bijoli krongoni ong·onchina didiaha. Adita somoirangna uko didiani ja·mano songni manderang aro police-rang uko ia bijoli krongoniko ra·onpilna man·aha,” ine South Garo Hills a·jani Superintendent of Police (SP) Rituraj Ravi, kobor ra·timgiparangna parakataha.
