TURA: Sajinmani somoio manderang neng·nikanirangko chagrongna nangtokengon, Meghalaya a·dokni gitcham minister aro Williamnagar-ni gitcham MLA Deborah C Marak-ba, X-ray machine aro Electrocardiogram (ECG) machine-ko Williamnagar Civil Hospital-na on·gilatpaaha.
Gitcham MLA-ni on·gilatanichi da·o Williamnagar Civil Hospital-o gnigipa X-ray machine-ko man·aha aro ian hospital-o X-ray ra·na nanggipa manderangna dakchakani ong·gnok.
Apsan daken Electrocardiogram ba ECG machine-ba mandeni ka·tong saa donganiko nina jakkalgipa ostro ong·ani gimin da·o gita COVID giproroani somoio ian Williamnagar civil hospital-o namen jakkaltobegipa ong·gnok.
Indake ong·engon, Williamnagar Civil Hospital-o Ultrasound/Sonography machine donggenchimoba, hospital-o ia ostroko jakkalgipa radiologist dongkujaengani a·sel ia ostroko jakkalna man·kujaenga ine kobor on·timgiparang u·iataha. Williamnagar civil hospital-o radiologist dongjae Sonography machine-ko jakkalna man·jaengani gimin East Garo Hills a·jao Sonography dakna nangenggipa bang·a manderangan aro mongsongbate an·o donggipa me·chikrang, CMC Vellore doctor-rangni chalaienggipa Jengjal Adventist Hospital-onasa re·ange sonography-ko daktokenga ineba kobor on·aha.
