TURA: Meghalaya a·doko 4th teacher-rangni dormahakoba gipin skigiparang gitan apsan on·china changni chang sorkario dabiengoba da·onan maming aganchakanirangko aro ku·rachakanirangko on·kujaengani gimin All Meghalaya 4th Teachers Association (AM4thTA) Garo Hills unit, changsataie a·dokni Education Minister-na iani bidingo memorandum-ko on·attaiaha.
AM4th TA-ni u·iatani gitade, re·anggipa bilsini October 9 tarikoba uamang apsan daken Education Minister-na memorandum-ko on·atahachim indiba ua maming aganchakanirangko on·kujaengani gimin una gisik ra·atpilaniko on·na gita Mongolbar salo memorandum-ko Deputy Commissioner-ni office gita on·attaiaha.
Education Minister-na 4th teacher-rangni see on·atgipa memorandum-o parakatani gitade, gipin skigiparang japrako gong 20,493 ka·e dormaharangko man·engoba 4th teacher-rangde japrako gong 12,000/-kosan man·paengachim.
Indian Constitution-o dongimin niamrangni gimin janapatengon, assistant teacher aro 4th teacher-rangni poraiani gadang aro kamrang apsan ong·genchimoba dormaha man·anirangde apsan ong·jaenga maina 2013 bilsini April 1 tarik dipet assistant teacher-rang gong 9000/- dormahako man·ahaoba 4th teacher-rangde gong 6000/-kosan man·aiachim aro 2017 bilsini January 1 tarik dipet SSA assistant teacher sakgittamde gong 20,493/-ko man·engoba 4th teacher-rangde da·onan japrako gong 12,000/-kosan man·engkua ine AGH4thTA GH unit parakataha.
“Chingaba assistant teacher-rang gitan apsan poraiani gadang donge apsan kamko ka·enggiparang ong·a indiba iandake 4th teacher-rangna dormahako komibate on·aniara 4th teacher-rangko onchepe ra·ani gita ong·enga,” ine AGH4thTA parakataha.
