TURA: South West Garo Hills a·jani Garobadha, Rangsakona aro Mukdangra jolrango mobile network-rangko name man·jaengani a·sel jolo songdongenggipa manderang aro mongsongbate poraienggipa chatro chatrirang neng·nikanirangko chagrongna nangtokenga ine Garo Students Union (GSU) Garobadha regional unit parakatenba, iani bidingo kamrangko niatchina gita South West Garo Hills a·jani Deputy Commissioner Ch Ramakrishna-na sedoataha.
GSU Garobadha regional unit-ni general secretary Bibian Momin-ni parakatani gitade, ia sal somoirango COVID-19-ni giproroaniko champengna lockdown-rangko ra·gatenganichi skul aro college-rangko chipe dontokna nangengon, chatro chatrirang internet gitasa class-rangko aro porikkarangko ra·skana nangtokenga indiba ia jolrango mobile network-rang namsrangjaengani a·sel chatro chatrirang class-rangko aro porikkarangko gimaatna nangtokengaha.
“Iandakgipa somoirango manderang noktangtangoni ong·katna man·jae an·tangtangni kamrangko aro class-rangkoba internet gitasa ka·na nangtokenga indiba Garobadha, Rangsakona aro Mukdangra jolrangode network-rang namsrangjaengani a·selan maming kamrangko ka·na man·tokjaenga,” ine GSU Garobadha unit-ni general secretary parakataha.
Iandake network-rangni namjaenganiara kam ka·giparangni simsakgijani ba tower-rangko nirok sandiani ba gipin a·selrangba ong·engnaba gnang ine janapatengon, ia jolrango network-rangko nambate on·na man·na gita kamrangko nirokatchina GSU Garobadha unit, South West Garo Hills a·jani DC-ko didiataha.