TURA: Re·anggipa Budbar walo, West Garo Hills a·jani police-rang, Improvised Explosive Device (IED) boma tarina jakkalgipa adita bosturangko Anogre joloniko man·aha ine kobor on·aha.
West Garo Hills a·jani SP VS Rathore-ni kobor ra·timgiparangna parakatani gitade, koborko man·soani ja·mano dolsa sipairang, Gabil jolona re·ange am·sandianirangko dakenba, national highway rama sambao IED boma tarina jakkalgipa adita bosturangko a·ningo dape donako man·aha.
“Koborko man·soa bakan chinga dolsa sipairangko ua biapona watataha aro sipairang, a·ningo dape dongipa bosturangko man·aha,” ine West Garo Hills a·jani SP parakataha.
Ua biaponiko police-rangni man·gipa bosturangara, Gelatin Stick (Class 2, Division-2, Cat-ZZ) kg 2.25, Non-Electric Detonator ge 8, Electric Detonator ge 8, Clipper ge 10, Cello Tape ge 2 aro fuse (Cordtex) metre 3 ong·achim.
Ia bosturangko a·ningo dape donanggipa manderang, ia bosturangchi IED bomako tarina miksongengachimkon ineba Rathore parakataha.
Ia apsan walni pringosan East Jaintia Hills a·jani Khliehriat police reserve-ko HNLC bobil dol, IED bomachi godapskaahachim ine nikna man·a. East Jaintia Hills a·jao bobil dolni boma gopdapanio darangba saknaanirangkode man·jaha indiba ia police reserve building-ni boundary wall nosto ka·ako man·skaahachim.
Indake ong·engon, Anogre jolo man·gipa bosturangni bidingo police-rang mokordomako ka·aha aro iani bidingo ning·tue sandianirangko dakengaha ine West Garo Hills a·jani SP parakataha.
Banoba chanchichipna kragipa manderangni re·ruraanirangko ba iandakgipa a·selrangko nikgenchimode ta·raken police-rangna kobor on·china gitaba SP, manderangko didiataha.
