SHILLONG: Re·anggipa Budbar pringwalo East Jaintia Hills a·jani Khliehriat-o donggipa police reserve quarter-rangko IED bomachi gopretagipani bidingo police-rang, mande saksako potchipe rim·aha.
East Jaintia Hills a·jani Superintendent of Police (SP) Jagpal Singh Dhanoa-ni u·iatani gitade, rim·ako man·gipa mandeni kosako police-rang, Explosive Substance Act-o pangchake Khliehriat Police Station-o mokordomako ka·aha.
“Ua somoio andalani gimin aro mikkarang jimbee waengani gimin bobil dake chakatgipa manderang cholko ra·e ia bomako gopretaha,” ine East Jaintia Hills a·jani SP parakataha.
Ia biapko boma gopretani ja·mano Hynniewtrep National Liberation Council (HNLC) dol, boma gopretanio jak donganiko jinmana parakatahachim.
Ia biapo boma gopretaniko a·kangatengon, HNLC dolni manderangko police-rang ka·saninggija dake kal·ake roenba so·ote galahani gimin police-rangko a·jak sokskana gita IED bomako gopretaha ine Budbar salo HNLC dol parakatahachim.
Indake ong·engon, boma gopretanio jak donggipa pilak manderangkon rim·na gita police-rang, ning·tue sandienga ine East Jaintia Hills a·jani SP parakataha.
