TURA: South West Garo Hills a·jani Zikzak block-o Tribal ong·gijagipa mandeko village employment council (VEC) secretary songani gimin Garoland State Movement Committee (GSMC) jegalatenba, ia mandeni pal Tribal-skarangonin secretary songchina dabiangaha.
Iani bidingo GSMC-ni co-chairman Balkarin Ch Marak aro gipin dilgiparang, Zikzak-ni block development officer-na memorandum-ko on·angaha aro apsan daken South West Garo Hills a·jani deputy commissioner-naba lekkako sedoataha ine u·iataha.
“A·chik a·songo Tribal ong·gijagipa manderangko VEC secretary songaniara A·chikrangko onchepani gita ong·enga. Uni gimin ia VEC secretary-ko ta·raken ra·galpilenba uni biapo A·chik saksako secretary songskachina chinga dabienga. Chinga dabianiko knachakjagenchimode chinga rakgipa ja·kurangko de·angskagen,” ine GSMC-ni co-chairman, South West Garo Hills a·jani officer-rangna seatgipa memorandum-o parakataha.