SHILLONG: Assam a·doko Cattle Preservation Bill-ko ra·gate Assam gita matchu salruraaniko champengna niamrangko donengani gimin ian Indian Constitution-ni ning·o on·gimin niamrangko pe·ani gita ong·enga ine Hynniewtrep Youth Council (HYC) parakataha.
HYC-ni parakatani gitade, ia Cattle Preservation Bill-ni Section 7-o Assam a·dok gita gipin a·dokrangona matchu salaniko champengatengani gimin ian Indian Constitution-ko pe·ani gita ong·enga maina Indian Constitution-ni Seventh Schedule-o a·dokrangni gisepo bading chiwalgrikna gita Union List-ni List 42-o on·gimin bil ong·a aro a·dokrangni gisepo bading chiwalgrikaniko Indian Parliament-ni pass ka·gimin niamrangna agrede darang a·dokba champengna gita bil ba niamrangko tarina man·ja.
Iani bidingo HYC-ni dilgiparang, Meghalaya a·dokni Deputy Chief Minister aro Animal Husbandry & Veterinary Minister Prestone Tynsong-ko grongenba, memorandum-ko on·angaha aro Assam-o ia Bill-ko ra·gatanichi Meghalaya a·dokoba matchurangko ra·baanio neng·nikanirangko man·gen ine ja·kurangko de·samsochina mikrakataniko on·angaha.
HYC-ni president Robertjune Kharjahrin-ni parakatani gitade, ia Bill-o matma salruraanikoba Assam a·doko champengna gita niamko donahani gimin ian Assam a·doko songdongenggipa Hindu-rangna mikkang nitee niamko tariani gitasa ong·enga aro Assam a·doko ia niamko ra·gatna on·genchimode mikkangchi gipin bosturangkoba a·dokona ra·baaniko champengnaba gnang.
“Meghalaya a·dokona Assam a·dokan mongsonggipa rama cholguga gita ong·engani gimin ian mikkangchi Meghalaya a·doko songdongenggipa manderangna bang·a neng·nikanirangko ra·banaba gnang,” ine Kharjahrin parakataha.
Meghalaya a·dokona gipin biaprangoniko Assam a·dok gitasa matchurangko ra·baengani gimin Assam-o ia Cattle Preservation Bill-ko niam dakatahaode matchurangko ra·baanio bang·a neng·nikanirangko chagrongna nanggnok ineba HYC mikrakataniko on·angaha.
Assam-o CPB-ko ra·gataniara Constitution-ko pe·ani gita ong·enga: HYC
Date:
Share post:
