Garo Hills-o lekka porani kamrangko namdapatchina NGO-rang, a·dokni CM-na sedoata

Tura-ni DSEO in-charge-ko sal 7-ni gisepon ra·galchina dabia

TURA: Garo Hills-o Education department-ni bang·bata kamrangkon name nirok sandianirangko dongjaengani a·selba lekka poranio ja·manchakna nangenga ine Garo Hills-ni dingtang dingtang NGO-rang, chong·motan Tura Garo Senior Citizens Forum (TGSCF), Garo Graduates Union (GGU), Association for Democracy & Empowerment (ADE), A·chik Youth Welfare Organisation (AYWO), Federation of Khasi Jaintia & Garo People (FKJGP), Garo Students Union (GSU) aro New Tura Development Forum (NTDF) dolrang parakatenba, Garo Hills-o lekka porani kamrangko nambate ka·na aro nirokangna man·na gita Education department-ni bangbang ong·e dongenggipa kamrangko gapatchina a·dok sorkario dabiangaha.

Adita salrangna skang chappa ka·gipa Performance Grading Index (PGI)-o lekka porani gita Meghalaya a·dokko India a·songo namjabatsranggipa a·dok ine parakgipani gimin janapatengon, iana dingtang dingtang kamrangko nisusaesa point-rangko on·genchimoba, Garo Hills-o Education department-ni administrative officer-rangko aro namnamgipa skigiparangko sorkari songe on·jaengani a·selba Meghalaya a·dok gimikna nangchakeani ong·engnaba gnang ine NGO-rang parakataha.

Indake ong·engon, Dadenggre Puri Government Secondary School-ni gitcham principal Ella Begum, maming official order gri, indita jarangna Tura-ni District School Education Officer (DSEO) ong·e kam ka·aniara niamni a·palo ong·enga ineba ia dolsni NGO-rang parakataha aro ia officer-ko salsnini gisepon ra·galchina gita a·dokni Chief Minister Conrad Sangma-ko didiataha.

NGO-rangni parakatani gitade, adita salrangna skangsan, Dadenggre-ni SDSEO-na West Garo Hills a·jani DSEO-ni kamkoba jako ra·china gita Education department, dingtangmancha ge·etaniko on·atmanahachim indiba adita salrangni ja·manon department-ni gita ia ge·etaniko ra·pile stay order-ko on·atskaahachim.

“Iandake office order on·aniko nike chinga pilakan aiao inmanbeaha maina iandakgipa kamrangara Education department-ni kamrango ja·donggaataniko ra·baani gita ong·gen aro officer-rangnaba namen gisik saatani gita ong·gen,” ine dolsni NGO-rang parakataha.

Ia dolsni NGO-rangni parakatani gitade, da·o Tura-ni DSEO in-charge ong·enggipa Ella Begum-ara, una skanggipa ong·anggipa DSEO-ni neng·takangaonin maming official order gri kamko jako ra·e ka·engaha aro uni iandake kamko jako ra·e ka·aniara office-ni niamrangko pe·ani gitaba ong·engachim.

“Ia officer (Ella Begum) niamni kosako kamko ka·rongani a·selan uni kosako bang·en kacharirango case ong·enga. Uni ong·gijagipa kamrangna uni kosako Assembly Committee-ni gitaba ja·kurangko de·china ge·etgiminrang dongani gimin chinga ia officer-ni kosako ta·raken ja·kurangko de·china didienga,” ine NGO-rang parakataha.

NGO-rangni parakatani gitade, da·o Tura-ni DSEO in-charge ong·e jako ra·enggipa Ella Begum-ko uni Dadenggre-o Government Puri Secondary School-ni principal-ona ra·doatani somoioba, uni namgijagipa kamrangni giminan Dadenggre-ni NGO-rang, uko kamko jako ra·na gita on·jahachim aro uni kosako raken jegalanirangko daktokahachim.

“Uni gimin chingaba ia officer-ko Tura-ni DSEO ong·aoniko salsnini gisepon ra·galchina dabienga,” ine dolsni NGO-rang parakatenba, ia dabianiko sorkari chu·sokatjagenchimode NGO-rang raka ja·kurangko de·anggen ine mikrakataniko on·angaha.

Education department-ko a·doko nambate chalaina man·na gita temporary aro in-charge dake officer-rangko songgija somoini kri permanent-na songchina gitaba NGO-rang dabiangaha.

Get real time updates directly on your device, subscribe now.

Comments are closed.