SHILLONG: Mijal Robibar salo, Assam Rifles-ni ong·atenggipa Green Sohra Plantation Drive ba bol ge·ani program-ko Union Home Minister Amit Shah a·bachengate on·angaha.
Ia program-ko ong·atanio Amit Shah, a·dokni Chief Minister Conrad Sangma aro gipin dilgiparangba, dingtang dingtang bol chararangko ge·angaha.
Ia bol ge·ani program-ko a·bachengate on·angani somoio Union Home Minister, jinmana aganprakangengon, a·gilsako ding·a sin·anirang batroroengahani gimin dingtanganiko ra·bana gita a·songni Prime Minister Narendra Modi-ba kamrangko ka·dilenga ine parakangaha.
Skango Cherrapunji-an a·songo mikka wabatsranggipa biap ong·achim ine janapatengon, manderangni simsakgija skatang bolrangko den·ani a·sel da·o mikka waanirang namen komiaha ine Shah janapatenba, Cherrapunji-ko mikka wabatsranggipa biap ong·atpiltaina gita bol wa·arangko ge·china aro simsak niroktokchina jolo songdongenggipa manderangko didiangaha.
Amit Shah-ni aganani gitade, Meghalaya a·dokni dingtang dingtang biaprango pang lak 1.48 bol chararangko ge·dilna gita Assam Rifles, ia Green Sohra plantation program-ko a·bachengaha.
Meghalaya a·doko bol chararangko ge·na gita sorkari, hectare 100 a·arangko sandimanaha ine janapatengon, ia hectare 100 a·arango bol chararangko ge·na gita gong kror 50 tangkako koros ka·gen aro ian Meghalaya a·doko dingtanganiko ra·bagen ine Union Home Minister parakataha.
“Meghalaya a·dokni hectare 100 a·arango pang million 1 bol chararangko bilsi gittamni gisepo ge·anggen aro ia bol chararangko Assam Rifles ge·dilanggen,” ine Shah aganaha.
Bolrangko ge·engon, uarangko galchipe donaigija dal·dalgipa bolrang ong·atna gita name nirokchina ua jolo songdongenggipa manderangko didiangaha.
Ia program-o dongpae bakko ra·anggipa gipin manderangara, DoNER Minister G Kishan Reddy, DoNER-ni Minister of State BL Verma, Science & Technology-ni MoS Jitendra Singh aro gipinrang ong·a.
