TURA: Garo National Liberation Army (GNLA) bobil dolni gitcham commander Rahul R Marak-ko, Garoland State Movement Committee (GSMC)-ni bimingo tangka gile ra·ani gimin North Garo Hills a·jani police-rang, Assam-oniko rim·aha.
Koborko on·ani gitade, ia mandeko North Garo Hills a·jani police-rang, ru·uta jarangna skangonin rim·na sandiengachim aro ia mandeni gimin koborko man·soenba police-rang, Assam a·dokni Kharding songona re·angenba, ia mandeko nok te·saoniko rim·na man·aha.
Ia mandeara GNLA-ni second batch-o training-ko matchotgimin manderangoni saksa ong·achim aro ua police-rangni jako rim·ako man·e ja·mano jamino pattokoni jokpilgipa ong·achim. GNLA bobil dolni bon·angani ja·man ua GSMC dolo nape, bading chiwalgiparangoniko aro ramarango re·ruragipa garirangoniko tangkarangko dabie ra·skaengachim.
Police-rangni u·iatani gitade, ia bilsini April 11 tariko dingtang dingtang dolrangni jingjengatengmiting somoioba ua North Garo Hills a·jani Soksan dolongko so·dilanio mongsonggipa mande ong·achim. Ua apsan jaon ua, chiringo picnic cha·enggipa manderang baksa kajia ong·ani ja·man uamangko dagger-chi chadrapnaba jotton ka·ahachim.
Ia mandeni kosako kachari non-bailable arrest warrant-ko on·ahaoba ua Assam-o kate dongengachim indiba Sukrobar salo uko police-rang rim·na man·aha.
