TURA: Adita salrangna skang, Garo National Liberation Army (GNLA) bobil dolni gitcham commander aro Garoland State Movement Committee (GSMC)-ni membor Rahul R Marak-ko police-rangni rim·ani ja·man, badiaba badiaba songbadrango GSMC dolko matnange seahani gimin GSMC Northern Zone, raken jegalatenba, a·songni on·gimin bilo pangchake dingtang Garoland a·dokko dabidilna gitasa GSMC-ko bikotaha ine talataniko on·angaha.
Police-rangni kobor on·ani gitade, GNLA bobil doloni ong·katani ja·man dingtang dingtang biaprango bading chiwalgiparangoniko tangka gildrae ra·ahani gimin adita salrangna skang, Rahul Marak-ko Assam a·dokni song damsaoniko rim·ahachim. Indake ong·engon, GSMC dolo napani ja·man ua ma·manti ong·gija kamrangko ka·aha ine songbadrango seaniko GSMC Northern Zone jegalatskaenba, GSMC-o donge uni tangkarangko gildrae ra·a ine matnanganirang kakket ong·ja ine parakatskaaha.
Ia bilsini April 11 tariko dingtang dingtang dolrangni jingjengatengmiting somoio Soksan dolongko so·anio jak donga ine matnanganikoba GSMC Northern Zone jegalataha aro ia kattarangara kakket ong·bebegenchimode ua somoion uni kosako FIR ka·na nangachim ine parakataha.
“North Garo Hills SP-ni parakatani gitade, Rahul Marak-ni kosako matnanganirangara kakket ong·ja aro uni kosako matnanganirang kakket ong·bebegenchimode SP-ni talataniko on·na skang maini gimin maming matnanganirang ba uni kosako badi ka·anirang dongjaha?” ine GSMC Northern Zone-ni co-chairman Jacky A Sangma sing·doataha.