SHILLONG: Sombar salo, Meghalaya aro Assam a·dokni sima ari jolrango dolgni dinggrikani a·sel adita so·sojengjeng ong·anirangko nikna man·ahani gimin mikkangchi dolgnini gisepo so·sojengjeng ong·anirang dongjana gita Mongolbar salo Meghalaya a·dokni Chief Minister Conrad K Sangma, Assam a·dokni Chief Minister Himanta Biswa Sarma baksa agangrikataha.
“Mikkangchi a·dok damgnini gisepo tom·tomaniko rakkiangna gita anga Assam-ni chief minister Himanta Biswa Sarma baksa agangrikataha,” ine Sangma parakataha.
Sombar salo, Meghalaya a·dokni Jirang constituency-ni ning·o donggipa Iongkhuli songni manderang, Assam police-rang baksa dinggrikaha ine koborko on·ahachim.
Kobor on·timgiparangni u·iatani gitade, ua somoio Assam police-rang, Meghalaya a·doko ga·akgipa Iongkhuli songona napdrabaenba, MeECL-ni songe dongipa bijoli krong ge·briko ra·galeahachim. Iani ja·mano songni manderang, Assam police-rang baksa nanggrikangahachim.
Indake ong·engon, mikkangchi ia jolrango a·dok damgnian nangrime dongangna man·na gita ua Assam-ni chief minister baksa agangrikataha aro uaba apsan daken tom·tomaniko rakkiangna ku·rachakataha ine Sangma parakataha.
“Chinga Assam-ni chief minister baksa, ia sima jolrango ong·enggipa obostarangni bidingo agangrikna a·bachengengahani gimin ia jolrango so·sojengjeng ong·atanirangko dontongchengna nangenga,” ine Meghalaya a·dokni Chief Minister parakataha.
Ia jolrangona re·angenba, obostarangko nirokchina gita ua Jirang-ni MLA-na ge·etaniko on·ataha ineba Sangma parakataha.
Ia apsan salon, Assam aro Mizoram a·dokni sima jolrangoba dolgni dinggrikahachim aro ia dinggrikanio Assam-ni sakdok manderangan sian baksana bang·bea manderang saknaanirangko man·tokahachim.
M’laya-Assam simao nanggrikgipani bidingo Conrad, Assam CM baksa agangrika
Date:
Share post:
