TURA: Re·anggipa July-ni 25 tariko Union Home Minister Amit Shah-ni a·bachengate on·anggipa ‘Mega Tree Plantation Drive’-ni bak gita Tura-o donggipa 120 Battalion CRPF dolba, salsanon pang 2500 bol chararangko dingtang dingtang biaprango ge·e bakko ra·angaha.
120 Bn CRPF-ni sipairang, bol chararangko Tura-ni ISBT, Resubelpara aro Williamnagar-o ge·angaha aro bolrangko ge·anio Guwahati CRPF Range-ni DIG Anil Kumar baksana 120 Battalion-ni pilak officer-rang aro sipairangba bakko ra·angaha.
Ia bol chararangko ge·anio CRPF Guwahati Range-ni DIG Anil Kumar, jinmana aganprakengon, ia sal somoirango a·gilsakni dingtangbaroroenganichi manderang dongtogijaniko man·engon, bolrangko ge·anichisan dingtanganiko ra·bapilna man·gen ine parakangaha.
Samtangtango ong·telaigiparangna simsak nirokchina gitaba ua CRPF-ni sipairangko aro jolo songdongenggipa manderangko didiangaha.
