TURA: Williamnagar Civil Hospital-na doctor-rangko songe on·chenggija ia hospital-ni psychiatrist aro eye specialist-ko gipin biapona ra·jitangahani gimin jegale East Garo Hills a·jani NGO-rang, District Medical & Health Office (DM&HO)-ko mijal Mongolbar sal dipet salgittamna office picketing ka·na a·bachengataha.
East Garo Hills a·jani dolbri NGO-rang, chong·motan GSU, FKJGP, AIGU, ICFS aro FAF dolrang, mijal Mongolbar sal dipet, DM&HO-ko salgittamna kam ka·na on·gija jingjengatna a·bachengaha.
GSU eastern zone-ni president Saljrang Tengrik R Marak-ni u·iatani gitade, Williamnagar civil hospital-ni psychiatrist aro eye specialist-ko gipin biapona ra·jitangahani gimin adita salrangna skangsan uamang poster campaign-ko dakeba, ia hospital-na ta·raken doctor-rangko songe on·skachina dabiangahachim indiba da·alona kingkingan uamangna iani bidingo aganchakaniko on·kujaengani gimin NGO-rang, DMHO-ko salgittamna office picketing ka·angskaengachim.
“Iani bidingo chinga Health & Family Welfare department-ni commissioner & secretary, joltangni MLA, East Garo Hills a·jani deputy commissioner aro DM&HO-naba sedoatahachim aro doctor-rangko songe on·chenggija ia hospital-ni doctor-rangko transfer ka·jachina didiatahachim. Chinga iani bidingo poster campaign-koba dake sorkarini kamko jegalahachim indiba chingni dabianiko sorkari knachakna gisiko nangjaenga,” ine GSU eastern zone-ni president parakataha.
W’nagar-o NGO-rang, DM&HO office-ko kam ka·na on·gija jingjengatenga
Date:
Share post:
