TURA: Budbar salo, Tura jillani Dakopgre jolo jasni ong·kuenggipa me·chik bi·sa saksa COVID man·e siangtaiaha aro ian a·gilsako ia sabisini ta·rakbee giproroenganiko mesokaniba ong·enga.
West Garo Hills a·jani Deputy Commissioner Ram Singh-ni u·iatani gitade, ia bi·sa bakgitchakni ma·gipa sabisiko man·chengaha aro uandaken ja·mano bi·saba ia sabisiko man·aha.
“Ia bi·sani ma·gipa COVID-ni tikako su·e ra·kujachim aro uandaken ua COVID-ko man·ani ja·man uni bi·saba COVID man·e siangna gita nangaha,” ine Singh parakataha.
Ia apsan salon, Proper Hawakhana-oni bilsi 70 ong·gipa mande saksakoba ka·tong sagitikahani gimin Tura Civil Hospital-ona ra·baahachim indiba uko hospital-ona ra·baon ua siahani gimin ja·mano doctor-rang, COVID-na porikka ra·e nion ua positive ong·aha ine kobor on·aha.
Tura jillako man·chape Garo Hills gimikon COVID man·giparang batroroenga aro uandaken Mongolbar salona kingkingde COVID man·ani 9.88 percent gapengaha.
Deputy Commissioner-ni u·iatani gitade, Tura jillao aro Garo Hills-ni gipin biaprangoba bang·a manderangan COVID-ni tikarangko su·na jechaktokengani a·sel COVID man·ani batroroenga.
Koborko on·ani gitade, Budbar salo sakchet manderangko COVID man·ahani gimin Tura Civil Hospital-ona rimbaaha aro ia sakchet manderangoni saksnide COVID-ni tika pongsakoba su·tokkujachim.
Batanggimin antisani gisepon West Garo Hills a·jao COVID man·e sianggiparang bang·ahani gimin health official-rang am·sandie nion, sianggiparangoni 95 percent-de ja·manchake sanna bananiko ra·na re·baahani a·sel aro 97 percent-de tikarangko su·kugijagiparang ong·a ine ma·sina man·ahachim.
Indake ong·engon, COVID tikani bidingo tol·e jangbingbanganirangko bebera·jachina aro man·a dipet ta·raken COVID-ni tikarangko su·e ra·china gita health official-rang didiataha.