TURA: Adita salrangna skang, Assam aro Mizoram a·dok damgnini simao dolgni dinggrikna nangahani gimin Meghalaya, Nagaland, Mizoram, Manipur aro Arunachal Pradesh a·dokni Youth Congress-rang, Assam sorkariko bil jakkale gipin a·dokrangko sinjetrongengani gimin jegalataha.
Assam a·doko Himanta Biswa Sarma, chief minister ong·a intalan sima arirango iandake police-rangni skatang dakani batroroengaha ineba ia a·dok dambongani Youth Congress-rang matnangataha.
“Assam a·dok baksa nangchapgipa salgro salaram a·dokrango Assam police-rang, napdrae manderangni bagan barirangko aro ma·manti gam-jinrangko nisie galengani a·sel ia jolrango donggipa ramram manderangsa neng·nikanirangko chagrongna nangtokenga. Sima arirango Assam police-rang, napdraenba iandake ramram manderangko sinjetna jotton ka·engani a·selan da·o ia a·dokrangni gisepo mikbu-miknenggrikani aro ding·chaogrikanirangko nikna man·engaha,” ine a·dok dambongani Youth Congress-ko dilenggiparang parakataha.
Salgro salaram a·dokrango iandake so·sojengjeng ong·aniranga North East Democratic Alliance (NEDA)-ni chu·sokgijaniko mesokani aro salgro salaram a·dokrango bil ra·sekna jotton ka·aniko mesokani ong·enga ineba Youth Congress-rang parakataha.
“Sima arirango ding·chaogrikataniko ra·bana jotton ka·rongengani gimin chinga Assam-ni Chief Minister Himanta Biswa Sarma-ni kamko raken jegalenga. Sarma chief minister-ni kamko ka·na kragipa mande ong·ja aro mikkangchi salgro salaram a·dokrango tom·tomaniko man·piltaina gita ta·raken uko chief minister-ni kamoniko ra·galchina chinga BJP-ni dilgiparango dabienga,” ine dambonga a·dokni Youth Congress-rang parakataha.